یار بیزه قوناق گله جک
یار بیزه قوناق گله جک
(آراز)ین اۏستۏن دن باخیرام سنه
یوللاری باغلاییب سرحد لر منه
یوبانسا مین ایلده گؤزله ره م یئنه
بیلیره م یار بیزه قوناق گله جک
اؤزۏده سۏز وئریب ساباح گله جک
***
اؤلکه میز بؤلۏنۏب سینیب بیله ییم ؟
نه قده رگؤزۏمده ن قان یاش اله ییم ؟
وطنین بیر لیی منیم دیله ییم
بیلیره م یار بیزه قوناق گله جک
اؤزۏده سؤز وئریب ساباح گله جک
***
قارداشلار هیجرانی یۏزدوخسان ایل دیر
گؤزلری آغلایان (ساوالان)(میل)دیر
بیر ده کی آنا دیل حالی نیسگیللی دیر
بیلیره م یار بیزه قوناق گله جک
اؤزۏده سۏز وئریب ساباح گله جک
***
(کۏر)مۏن سویونا باتماق ایسته ره م
جانیمی جانینا قاتماق ایسته ره م
قارداشیم وصلینه چاتماق ایسته ره م
بیلیره م یار بیزه قوناق گله جک
اؤزۏده سۏز وئریب ساباح گله جک
***
(ممدلی) دولانیر قارداش سوراقدا
ایل لردیر قالیبدی اون دان اوزاقدا
بیر اؤپۏش حسرتی یانیب دوداقدا
بیلیره م یار بیزه قوناق گله جک
اؤزۏده سۏز وئریب ساباح گله جک
ممدلی
هدف از ایجاد این وبلاگ جمع آوری مطالب و آگاه سازی عزیزان می باشد