گتمه ترسا بالاسی منده سنه سایه گلیم
دامنیندن یاپوشوپ منده کلیسایه گلیم

یا سن اسلامی قبول ایله منیم دینیمه گل
یادا تعلیم ایله من مذهـب عیسایه گلیم

آنا بطنینده سنیله اکیز اولسیدیم اگر
ایستمزدیم دوغولوب منده بو دنیایه گلیم

سن بو قامتله گوزل باغا چیخان بیر سرو اول
منده عزمیله هم او باغا تماشایه گلیم

ناز و غمزه، یرشین حالیمی بیحال ایلدی
جرأتیم اولمادی کی باشقـا تمنایه گلیم

سن منیم دینیمه گل عز و وفا توره منه
منده اوز عهدیمیله نالـه سودایه گلیم

سن گدیپ حاجی کیمی عشق بساطینده یاتیپ
پیر میخانه ایله منده او مأوایه گلیم

اذن وئر توی گجسی من ده سنه دایه گلیم

ال قاتاندا سنه مشاطه،تماشایه گلیم

سن بو مهتاب گجه سی سیره چیخان بیر سراول

اذن وئر ،من دالونجا سورونوم سایه گلیم

منه ده باخدین او شهلا گوزله ،من قاراگون

جرئتیم اولمادی بیر کلمه تمنایه گلیم

من جهنم ده ده باش یاسدیقا قویسام سنیله

هیچ آییلمام کی دوروب جنت مآوایه گلیم

سن یاتیب جنتی رویاده گورنده گجه لر
من ده جنتده قوش اولام ،کی ،او رویایه گلیم

قیتلیغ ایللریاغشی تک قورویوب گوز یاشیمیز

کوی عشقونده گرگ بیرده مصلایه گلیم

سن ده صحرایه مارال کیمی بیر چیخ ،نولی کی

من ده بیر صیده چیخانلار کیمی ،صحرایه گلیم

آلاهوندان سن اگر قورخمیوب،اولسان ترسا

قورخورام من ده دونوب ،دین مسیحایه گلیم

شیخ صنعان کیمی دونقوز اوتاریب ایللرجه

سنی بیرگورمک ایچون معبد ترسایه گلیم

یوخ صنم!آنلامادیم ،آنلامادیم،حاشا من

بوراخیم مسجدی ،سنله کلیسایه گلیم!

گل چیخاق طور تجلایه،سن اول جلوه ی طور

من ده موسی کیمی،او طور تجلایه گلیم

شیردیر (شهریار)ین شعری،الینده شمشیر

کیم دئیه رمن بئله بیر شیرله دئوایه گلیم؟