✍️میرزا علی معجز شبسترلی

💢وئرمز

منه بیر باده وئر ساقی که می دینه ضرر وئرمز
دلیل محکم ایستر ادعا، بوش سوز ثمر وئرمز

سوروشدیم ساقیا میخانه ده بیر مردِ کاملدن
فلک مرد سخندانه نه دندیر سیم و زر وئرمز؟

دئدی: "سیم و زریله سینه سین تزیین ائدر عورت
او ناقصلر اوچوندور کامله ناقص اثر وئرمز"

 جواهردیر سؤزو مرد سخندانین حقیقتده
که سلطان هر لیاقتسیز کَسه لعل و گهر وئرمز

 دئییرلر روزه داره حق ائدر یوزمین شهر احسان
اونا بیر استکان چای وئرمه ین یوز مین شهر وئرمز

 خراب ایلر اوشاقین کله سین اوهام افسانه
ضرر طفل دبستانه عمی زیر و زبَر وئرمز

 عوامین باشنا نوختا ووروبسان اطلاعیم وار
او ائششکلر سنه دولما وئرر، اما بشر وئرمز

منه لعل لبین یانیندا بیر یئر وئر ایا مطرب
دئییلر شیخ طولانی سنه جنتده یر وئرمز

 مرخص قیل یوزوندن بیر ئوپوم ای دلبر رعنا
که هر کس بیر گونول شاد ائیله سه، الله کدر وئرمز

 بوگون ملت نیه محتاجدر اوندان بیان ایله
گؤی علمین بلمک، ایران اهلینه نفت و شکر وئرمز

 بوراخ هاروتی ماروتی، گتیر میدانه باروتو
سپاه دشمنه قارداش آیت الکرسی خطر وئرمز

 او گؤی که گؤرمه میش عؤمرونده بیر یول بینوا واعظ
بیزه بحث ایلر اوندان گؤردوگو یئردن خبر وئرمز

رعیتدن آلار باج و خراج هر گون قلندرلر
ولی عمرینده بیر شاهی بیزه صاحب تبر وئرمز

آلیبدیر دوره سین دشمن وطن فریاد ائدر آغلار
یانیب اهل وطن راحت اونا سَس بیر نفر وئرمز

 وئره ر دشمن جوابین ساده رو بیرچکلی اوغلانلار
زنخدانی مَسقل، باشی قیرخیخ نوحه گر وئرمز

 خدا وئردی گلوب تنگه الیندن معجزین یاران
بو دا "من شاعرم" دئییر، دؤلتین حقین ییه ر وئرمز

📖قایناق: دیوان معجز شبستری، جلد اول، صفحۀ 175